إذا كان النظام سقط الشهر المنصرم فالثورة سقطت من سنين

 إذا كان النظام سقط الشهر المنصرم فالثورة سقطت من سنين

إذا كان النظام سقط الشهر المنصرم فالثورة سقطت من سنين

هيك قلي أبو عمر لما قلتلو انبسط انتصرت الثورة أخيراً

فرجينا شو رح يطلع معكم..

هلا مين أبو عمر هي سردة طويلة رح قلكم ياها ، بس بالأول عنا مشوار صغير بالذاكرة..

بل ٢٠١٨ لما صار تفاهم دولي وأجت الباصات لحتى تعبي الثوار من الغوطة وتاخدهم على أدلب ، طلع فديو لشب من جوبر عم يبكي ويقول أنهم خانونا وخذلونا وباعونا

نحنا ما نهزمنا ومستحيل ننهزم ولو ضل النظام ألف سنة 

متر واحد ما كان قادر يدخل بجوبر .

فكانت كل تعليقات على الفديو وأكتر من ٥٠٠٠ تعليق

يلا ولاك ... عالباص ولاك .. الخ الخ 

بس للحقيقة هو معو حق ، أنا أكتر إنسان بعرف أنو

لو ضل الجيش ألف سنة يدق على بطنو مستحيل كان يقدر ياخد متر بجوبر ، ف مابالكم كل الغوطة ؟

كان الجيش كل سنة يتقدم بناية او بنايتين بلكتير

وترجع تروح وحفر أنفاق وتفجيرات وقصص .

المهم منشان لا نطول بالسيرة هاد شب مو بس كان معو حق

لا ياسيدي والثوار يلي كانوا بالغوطة أكتر من مرة وصلو 

لعند البانورما ، وكانوا قادرين يكملو على الشام وتجيهم أوامر بالانسحاب فينسحبو .

المهم لما طلعوا بالباصات ، صارت مشكلة تاني يوم وما عاد بدن يطلعو إلا بشرط واحد .. شو هو الشرط ؟

ممنوع تتفتش الباصات ، مع أنو الدولة كانت سامحتلن ياخدو سلاح خفيف معن .. فأنو شو بدن أكتر ؟

المصاري القادة بدها تطلع المصاري يلي جمعتها 😊

نكتة على السريع كانوا الثوار بالغوطة ياخدو رواتبهم بالليرة السورية مع أنها تجي من برا دولار .

كانت السيارات تطلع من برزة على المركزي تحط دولار وتاخد سوري 😁.

المهم برضو مشان لا نطول السيرة أكتر ، يوم يلي راحو على أدلب ، نص القادة كملت على تركيا وتفاجأت الناس يومها

أنو عندهم شركات ومولات ومصانع بتركيا ، والشباب يلي كانت تقاتل عنجد راحو قعدو بمخيمات هنن وأهالين .

في نص تاني ضل بالغوطة وقلنا يا سلام هلا رح يحق الحق وتجي العدالة ويتحاسبو ، وإلا طج غم بتجي الدولة بتعملن تسوية تحت شعار لم تتلطخ أيديهم بالدماء 

بتخلص القصة هون لا أبداً ، نص يلي كانوا قادة مع المسلحين بيعملو تسوية وبصيرو قادة بالدفاع الوطني ولاحقاً الرابعة وبيستلمو حواجز السرقة والتشليح 

أما شباب لعاديين لاحقاً بيرجع لأمن يعطفوهم واحد ورا التاني .

هلا شو ملخص هي القصة 

ملخصها أنو القادة هنن أمراء حرب .. وامراء الحرب ما بتخسر ،كيف ما برم الدولاب ما بتخسر ..

لأن دايماً القادة من الطرفين بينهم تواصل وتفاهمات وقصص وعملات فمستحيل يخسروا .

يلي بيخسر هو الفقير ويلي ماسك القضية

سواء يلي جد كان طالع ثائر ويلي جد كان يطالع يدافع عن مؤسسات دولة ، هدول خسرانين بكل الأحوال .

هلا بقا بحكيلكم مين أبو عمر 

هاد يا سيدي بل ٢٠٢١ كنت لسا عسكري وكان شاحطني الجوع ، وكنت بحاجة أي شغل بعد الدوام دبر اموري فيه .

المهم بتخلص فيي الدنيا شغيل على بسطة 

على استراد المزة ، بأول يوم شغل استلمت الوردية الليلية بقلي صاحب البسطة دير بالك من هداك لقاعد على لبسطة التانية ، هاد كان مع لمسلحين وعامل تسوية .

ف انا بقلو حاضر 

هو بلف ضهرو من هون وأنا بحمل حالي وبروح اتعرف على الشب من هون😁

المهم أبو عمر احلى زلمي شب من درعا كان مع الجيش الحر 

اجت طلقة قناص برجلو ، ف للاسف انبترت رجلو وركب رجل صناعية .

هلا أول يومين ما كتير أخدنا هوى ببعض كونو المفترض  نحنا أعداء ويمكن بغير ظروف كنا قوصنا على بعض

بس يا أخي الليل طويل وبملل ، وهو بسطة صاج ريحة الأكل بتوصل لأخر دنيا وأنا عندي ماكينة اسبريس ريحة لقهوة بتشق القلب ، فمصالح متبادلة ترافقنا .

هلا أنا كنت مع الجيش النظامي وهو كان مع الجيش الحر

ونحنا تنين كانت اخرتنا اشبه بالمتسولين .

مثلاً بالصيف بس ينزلوا هالمغتربين ويصفو هسيارة قدامنا

ويفتحو هشباك لياخدو شي .

اطلع فيه هيك وقلو لك ابن الحرام لو سافرنا وصرنا خلق وبشر مو احسن ما ضلينا نقوص على بعض متل البقر ؟

ولا بس تمر صبية حلوة يقلي يا ابن لحرام لولاك كانت رجلي لساتها وكنت رحت زبطتها .

هيك لحتى بيوم أجت البلدية وشالت بسطاتنا أنا وأبو عمر 

والحجة "مظهر غير حضاري"

المحافظة أبداً ما فرقت بينا ولا سألت كل واحد مع اي طرف كان ، قبعونا نحنا لتنين  "مظهر غير حضاري".

هلا حاج ذكريات ومنجي لليوم للوقت الراهن .

المحافظات تسلمت تسليم ولو ما في قرار دولي كانت لهلا لمعارك شغالة بحلب ، إذا أنت شايفها لا تحررت وفتح اسلامي وسكوت يا كلب ف خلص متل مابدك بس هاد لبوست مو الك ما في داعي تكمل .

المهم المحافظات تسلمت تسليم ويلي سلمها أكيد القادة 

لذلك يا أخواني محبي العدالة ، أنا اسف بس لا تنتظروا محاكمات روس كبيرة لانهم شريك😊

يلي عم يتسائل لي ما بصير محاكمات عادلة ؟

أسف بس مافي محاكمات عادلة ، رح يشحطوا كم عسكري يلبسوهم كلشي ومو بس هيك لا تستغربوا تسمعو اسماء قادة كبار أمنيين وعسكريين بالتشكيل الحكومي لجديد 

نصيحة تانية لا تزعل رفيقك أو أبن ضيعتك أو منطقتك

وتفوتو بمهاترات علوي وسني لأن شهرين زمان ورح ترجع القصة قصة غني وفقير واحتمال كبير تلتقى انت وياه

على شي مجلى بشي مطعم أو شغيلة بشي أرض .

نصيحة تالتة مع كامل حبي للمغتربين وهنن أكيد اهلنا 

بس عدم المؤاخذة رح يجو يتسلو كم يوم 

ويرجعوا لحياتهم الاوروبية بس أنت ما عندك حياة اوروبية

ترجع الها لهيك لا كتير تركز بشو عم يساوو ويحكو 

هنن عندن رفاهية اختيار أنت ما عندك ياها .

نصيحة رابعة نحنا عرب عرب لا تخاف ، الفساد معشش بدمنا ورح نضل فاسدين ، بدك علمانية صدقني بس يكون معك مصاري رح تعيش العلمانية بهالبلد 

بدك اسلامية صدقني رح تعيشها بس يكون في مصاري 

نصيحة خامسة إذا حدا قلك تعال ندافع عن كرامتنا وكرامة هي الطائفة قلو روح دافع أنت ليكني ناطرك قلبي معك

وإذا حدا قلك تعال نحارب هالكفار لحتى ننصر الدين

قلو للبيت رب يحميه روح أنت جاهد وتركني جاهد بشغلي.

النصيحة الأخيرة 

أنت رح تعيش حياة وحدة وصدقني الموضوع مو حق وباطل ، مو ظلم وعدالة الموضوع أعقد من هيك بكتير

علقة وسخة كتير وأنت إنسان بسيط مو قدها فخليك بعيد

تروك الفيس والسياسة والأخبار 

حاج تنشف دمك بالتعليقات والبوستات والمهاترات 

حب جيرانك ورفقاتك إذا فيك 

وركز بدراستك أو شغلك ومستقبلك 

بتقدر تسافر سافر ، ما بتقدر روح اشتغل وزبط أمورك لحتى تسافر ، عمول أي شي لمصلحتك ومصلحة أهلك 

لأن مرة تانية متل ما قال أبو عمر 

إذا النظام سقط الشهر الماضي .. فالثورة سقطت من سنين

ايام قليلة ورح تبطل شغلة علوي وسني ونرجع نعيش اهل واحباب متل الاول واحسن وترجع شغلة غني وفقير . فقط

فأوعى تضل فقير .